Мрежата за јавна администрација на Европската унија (EUPAN) ја создава Заедничката рамка за проценка – ЦАФ моделот (Common Assessment Framework – CAF ) во 2000 година, како прв европски инструмент за управување со квалитет специјално прилагоден и изработен за јавниот сектор.
Заедничката рамка за проценка (ЦАФ моделот) е алатка за целосно управување со квалитетот развиена од јавниот сектор за јавниот сектор, инспирирана од Моделот на Европската фондација за одличност во управување со квалитет (EFQM®). Се заснова на претпоставката дека одличните резултати во организациските перформанси, граѓаните/клиентите, луѓето и општеството се постигнуваат преку стратегија за лидерство и планирање, луѓе, партнерства, ресурси и процеси. Во исто време ја разгледува организацијата од различни аспекти: холистичкиот пристап кон анализата на перформансите/ефектите на организацијата.
Целта на заедничката рамка за проценка е да биде катализатор за целосен процес на подобрување во рамките на организацијата и истата има пет главни цели:
- да ја запознае јавната администрација со културата на одличност и принципите на целокупно управување со квалитет;
- да ги води институциите постепено по целосно усогласен демингов циклус “планирањеспроведување–проверка-дејствување”;
- да го олесни самооценувањето на јавната организација со цел да се добие добра претстава за активностите за подобрување;
- да има улога на мост помеѓу различните модели што се користат во управувањето со квалитетот, и во јавниот и во приватниот сектор;
- да го олесни учењето помеѓу организациите од јавниот сектор.
Моделот на заедничката рамка за проценка (ЦАФ моделот), има структура со девет критериуми. Критериумите ги идентификуваат главните аспекти кои е потребно да се разгледаат во секоја организациска анализа. Критериумите 1-5 се однесуваат на менаџерските практики на една организација: таканаречени Овозможувачи (Enablers). Тие одредуваат што прави организацијата и како истата пристапува кон своите задачи за да ги постигне посакуваните резултати. Во критериумите 6-9, постигнатите Резултати во областите на граѓаните/клиентите, луѓето, општествената одговорност и клучните перформанси се мерат со мерки за перцепција и перформанси/ефекти. Секој критериум е дополнително поделен на листа на под-критериуми. 28те под-критериуми ги идентификуваат главните прашања кои треба да се земат во предвид при оценувањето на една организација. Тие се илустрирани со примери кои подетално ја објаснуваат содржината на под-критериумите и предлагаат можни области на кои треба да се обрне внимание, со цел да се испита како администрацијата ги исполнува барањата изразени во подкритериумот.
Користењето на ЦАФ моделот е процес на учење за секоја организација. Сепак, секој нов корисник може да има корист од научените лекции во текот на неколку години на имплементација. Затоа е развиен план за имплементација од 10 чекори за да им се помогне на организациите да го користат ЦАФ моделот на најефикасен и ефективен начин.
